Si të dish nëse kafja do të ketë shije të mirë

S’mund ta vlerësosh një libër sipas kopertinës që ka, por mund ta vlerësosh një kafe bile dhe pa e shijuar së pari. Por, jo gjithmonë, por sigurisht që këtë mund ta bësh nganjëherë. Më poshtë kemi disa ide vizuale për t’ju ndihmuar të dalloni të mirën nga e keqja dhe e shëmtuara.

 

Kapuçinot

 

Në foton anash, shohim dallimin mes një kapuçinoje të bërë mirë, me një mazë të kadifenjtë sipër saj, dhe llojit të kapuçinos që shërbehet në disa nga restorantet më të mira në botë: një kaos i dendur i shkumës së tharë, e hedhur mbi një espresso të keqe. Dallimi është më i madh sesa që mund të shihet, megjithëse vetëm pamja të tregon diçka për shijen.

 

Ndërsa kafja në të majtë do të ketë një balancim mes qumështit dhe shijes së espressos (pak nga të dyja me çdo gllënjkë) që plotëson strukturën e saj të kadifenjtë, tjetrës do t’i mungojë ëmbëlsia në sajë të të shkumës së qumështit të djegur, dhe pirësit do t’i duhet të kapërdijë tërë shkumën e rëndë me qëllim që të mbërrijë shijen e kafesë – ashtu siç është – përfund.

 

A ke çfarë të bësh për të shpëtuar një kapuçino të këtillë? Fatkeqësisht, jo shumë, përveç, ndoshta, një përzierjeje të fortë për të bërë bashkë kafenë dhe shkumën, si dhe pak sheqer për të kompensuar ëmbëlsinë natyrale që nuk del dot nga ai qumësht katastrofik.

 

Espresso

 

Oh, zemër! Espresso është e ndërlikuar, ngaqë edhe espressot që duken mirë nganjëherë mund të kenë shije goxha të keqe. Është shumë vështirë të vlerësosh një espresso vetëm nga dukja. Por, ka disa elemente që mund t’ju çojnë në një drejtim të përgjithshëm, i cili, në disa raste, mund të jetë drejt daljes nga lokali.

 

Mënyra më e lehtë për të vlerësuar një kafe është të këqyrësh ngjyrën dhe elasticitetin e kremit. Në foton anash, ju mund të shihni sa e zbehur duket sipërfaqja e espressos në të majtë, ndryshe nga tjetra në të djathtë që është më e zezë, me shkumë më të rëndë. E para mund të nënkuptojë që filxhani ka pritur një kohë të gjatë, derisa kremi plotësisht është shpërndarë (ndoshta pesë minuta), apo baristi mund të ketë përdorur kafe të bluar trashë apo të ketë përdorur sasi të tepërt uji. Në cilindo rast, rezultati me gjasë do të jetë një kafe e hidhët, e hollë, që i mungon çfarëdo ëmbëlsie apo karakteri.

 

Mënyra më e mirë për të mos u bërë telash me një “espresso” të hollë si kjo më sipër? Çili sytë mirë: të këqyrësh se si duken pijet e myshterinjve tjerë mund të parandalojë humbjen e parave nga blerja e një uji bojë kafe me kafeinë.